اسلام آباد: ڀارتي پرڏيهي وزير سشما سوراج ايئرپورٽ کان ٻاهر ايندي
اسلام آباد: ڀارتي پرڏيهي وزير سشما سوراج هارٽ آف ايشيا ڪانفرنس ۾ شرڪت لاءِ پاڪستان پهچي وئي آهي، هـُو وزيراعظم نواز شريف ۽ پرڏيهي صلاحڪار سرتاج عزيز سان به ملاقات ڪندي، ڀارتي پرڏيهي وزير جي دوري دوران ٻنهي ملڪن وچ ۾ ڪرڪيٽ سيريز بابت به گرين سنگل ملڻ جو امڪان آهي. پئرس ۾ وزيراعظم نواز شريف ۽ ڀارتي هم منصب نريندر مودي وچ ۾ ٿيل ملاقات کانپوءِ ٻنهي ملڪن وچ ۾ برف رِجـَڻ لڳي آهي، بينڪانڪ ۾ پاڪ-ڀارت قومي سلامتي جي صلاحڪارن وچ ۾ ٿيل ملاقات بعد ڀارتي پرڏيهي وزير سشما سوراج به اڄ پاڪستان پهچي وئي آهي. سشما سوراج هارٽ آف ايشيا ڪانفرنس ۾ شرڪت ڪرڻ سان گڏ وزيراعظم نواز شريف ۽ پرڏيهي صلاحڪار سرتاج عزيز سان ڌار ڌار ملاقاتون ڪندي. ذريعن موجب، ملاقات دوران ٻنهي ملڪن وچ ۾ ڇڪتاڻ گهٽائڻ، پاڪ-ڀارت ڳالهيون ٻيهر شروع ڪرڻ لاءِ نئين ايجنڊا طئي ڪرڻ سميت اهم معاملن تي بريڪ ٿرو ٿيڻ جو امڪان آهي. ڀارتي پرڏيهي وزير سشما سوراج جي پاڪستاني اعليٰ عملدارن سان ملاقات بعد ٻنهي ملڪن وچ ۾ هلندڙ مهيني رٿيل ڪرڪيٽ سيريز بابت به فيصلو ٿيڻ جو امڪان آهي. وزيراعظم نواز شريف ۽ نريندر مودي وچ ۾ ملاقات ۽ بينڪانڪ ۾ پاڪ-ڀارت قومي سلامتي جي صلاحڪارن وچ ۾ ٿيل ملاقات بعد سشما سوراج جي دوري کي انتهائي اهميت ڏني پئي وڃي ۽ اميد ظاهر ڪئي پئي وڃي ته ٻنهي ملڪن جي لاڳاپن ۾ بهتري ايندي. سشما سوراج وزيراعظم نواز شريف ۽ پرڏيهي صلاحڪار سرتاج عزيز وچ ۾ ملاقات بابت ڀارتي وزيراعظم نريندر مودي کي بريفنگ ڏيندي، جنهن بعد ٻنهي ملڪن وچ ۾ سيڪريٽريز ۽ ڊي جي ملٽري آپريشنز جي سطح تي به ڳالهين ۾ به اهم اڳڀرائيءَ جو امڪان آهي.
