پهرين لائين جي بندن جي مرمت جو ڪم جون جي آخري هفتي ۾ مڪمل ٿي ويندو: تي ڊائريڪٽر سيڊا
گهوٽڪي: ڊي سي او گهوٽڪي زاهد علي عباسي ڊائريڪٽر سيڊا ۽ ايريگيشن جي عملدارن سان بندن جي مرمت جي سلسلي ۾ تفصيلي جائزو وٺڻ لاءِ پنهنجي آفيس جي ڪاميٽي روم ۾ گڏجاڻي ڪوٺائي. ان موقعي تي ڊائريڪٽر سيڊا ڊي سي او کي تفصيلي بريفنگ ڏيندي ٻڌايو ته پهرين لائين جي بندن جي مرمت جو ڪم جون جي آخري هفتي ۾ مڪمل ٿي ويندو جڏهن ته ٻئين لائين جو ڪم جولاءِ جي پهرين هفتي ۾ مڪمل ٿي ويندو. ان موقعي تي ڊي سي او ايريگيشن ۽ سيڊا جي عملدارن کي سختي سان هدايت ڪئي ته هو فوري طور تي بندن جي مرمت جو ڪم مڪمل ڪن ان سلسلي ۾ ڪنهن به قسم جي ڪوتاهي ۽ سستي برداشت نه ڪئي ويندي. ان موقعي تي هن ڊي پي او کي چيو ته هو بندن تي ڪم ڪندڙ عملدارن ۽ مزدرون لاءِ سيڪيورٽي کي يقيني بڻائي ته جيئن هو آساني سان ڪم ڪري سگهن. ان سلسلي ۾ هن واسطيدار ڊي ڊي او روينيو ۽ مختيارڪارن کي هدايت ڪئي ته هو بندن تي هلندڙ ڪمن جي نگراني ڪن ۽ ايريگيشن عملدارن کي لاڳاپيل سهولتون مهيا ڪن. ان سلسلي ۾ هو ايندڙ هفتي پوري بندن جو تفصيلي دورو ڪندو.