ڊاڪٽر نبي بخش خان بلوچ گذريل رات هن فاني جهان مان لاڏاڻو ڪري ويو

حيدرآباد : سنڌ جي تاريخ کي پنهنجي ڏاهپ ۽ دانشمندي سان سهيئڙيندڙ ۽ نوجوان نسل ۾ سنڌ جي تاريخ جي ڄاڻ پکيڙيندڙ ناليوارو محقق، اديب، تاريخدان، تعليمدان ۽ سنڌ جي اڪابر شخصيت ڊاڪٽر نبي بخش خان بلوچ گذريل رات هن فاني جهان مان لاڏاڻو ڪري ويو جنهن کي اڄ شام سنڌ يونيورسٽي ڄامشورو ۾ علامه آءِ آءِ قاضي جي مزار جي پاسي ۾ هزارين آلين اکين سان مٽي ماءُ حوالي ڪيو ويو _ ان کان اڳ سنڌي مسلم سوسائٽي حيدرآباد ۾ سندس رهائشگاهه آڏو تڏو وڇايو ويو جنهن ۾ سنڌ جي سياستدانن، اديبن، محققن، تاريخدانن، تعليمدانن، سماجي ڪارڪنن، سرڪاري عملدارن ۽ عام ماڻهن شرڪت ڪئي _ ان موقعي تي ميڊيا سان ڳالهائيندي بين الصوبائي رابطن واري وزير ۽ سنڌي ادبي بورڊ جي چيئرمين مخدوم جميل الزمان چيو ته ڊاڪٽر اين اي بلوچ جهڙا ڏاها، مدبر، مفڪر ۽ تاريخدان صدين ۾ پيدا ٿيندا آهن _هن چيو ته ڊاڪٽر اين اي بلوچ هڪ تمام سهڻي طبيعت جو مالڪ هو جيڪو سچ سان محبت ۽ ڪوڙ سان نفرت ڪندو هو _ هن وڌيڪ چيو ته ڊاڪٽر نبي بخش خان بلوچ شاهه ڀٽائي جو وڏو پارکو هو جنهن شاهه سائين جي شاعري تي وڏو ڪم ڪيو _ هن چيو ته ڊاڪٽر نبي بخش خان بلوچ ٻاراڻي ادب کان وٺي سنڌي ادب سميت سنڌ جي تاريخ، لوڪ ادب، لسانيت، ثقافت توڙي سنڌ ۾ رهندڙ ماڻهن جي ذاتين ۽ ٻولين ۽ پهاڪن تي جامع ڪتاب لکي سنڌ جي عوام تي وڏو احسان ڪيو _ هن چيو ته سندس مختلف موضوئن تي 160 کن ڪتاب ڇپيل آهن ۽ ڪافي اڻ ڇپيل مواد به پويان ڇڏيو آهي _ هن چيو ته ڊاڪٽر نبي بخش خان بلوچ پنهنجي پاڻ ۾ هڪ تاريخ هو _ميڊيا جي نمائندن سان ڳالهائيندي سنڌ جي ناليواري ڏاهي محمد ابراهيم جويي چيو ته ڊاڪٽر نبي بخش خان بلوچ جو موت سنڌ، سنڌي عوام ۽ سنڌي ادب لاءِ تمام وڏو سانحو آهي جنهن جو خال صدين ۾ نٿو ڀرجي سگهي _هن چيو ته مرحوم سادي طبيعت جو مالڪ هو جنهن ڪڏهن به اصولن تي سوديبازي نه ڪئي ۽ پنهنجي سڄي ڄمار سنڌ جي نوجوانن ۽ سنڌي ادب توڙي سنڌ جي ترقي لاءِ پاڻ پتوڙيندو رهيو _ميڊيا جي نمائندن سان ڳالهائيندي سنڌ يونيورسٽي جي اڳوڻي وائيس چانسلرمظهر الحق صديقي چيو ته سنڌي ادب لاءِ سائين جون خدمتون هميشه ياد رکيون وينديون ۽ ڊاڪٽر نبي بخش خان بلوچ جي لاڏاڻي کانپوءِ سنڌ هڪ عظيم ليکڪ ۽ تاريخدان کان محروم ٿي وئي ۽ڊاڪٽر بلوچ جهڙا ماڻهو ورلي پيدا ٿيندا آهن

_ هن چيو ته ڊاڪٽر نبي بخش بلوچ نه فقط ادبي پر زندگي جي هر شعبي ۾ پنهنجو ڀرپور ڪردار ادا ڪيو آهي _ سنڌجي ناليواري ڏاهي ڊاڪٽر غلام علي الانا چيو ته ڊاڪٽر نبي بخش خان بلوچ مخدوم محمد زمان طالب الموليٰ ۽ حسام الدين راشدي جي سطح جو ماڻهو هو جيڪو پورهيتن جو يار هو جنهن سنڌ جي نوجوانن ۾ سنڌ جي تاريخ بابت شعور پيدا ڪرڻ لاءِ پنهنجو ڀرپور ڪردار ادا ڪيو _هن چيو ته مرحوم هميشه ڪم تي يقين رکندو هو اهو ئي سبب آهي جو هو ڪڏهن ڪڏهن ارڙهن ڪلاڪن تائين به ڪم ڪندو رهندو هو _هن چيو ته سائين هڪ بين القومي شخصيت هو جنهن جو اندازو ان مان لڳائي سگهجي ٿو ته آمريڪا ۾ قائم ميوزيم جي ايشيا گيلري کي پڻ ڊاڪٽر اين اي بلوچ جي رهنمائي سان تعمير ڪيو ويو آهي ائين ئي دنيا جي ٻين ملڪن ۾ به سنڌ جي حوالي سان ٿيندڙ ڪمن ۾ ڊاڪٽر اين اي بلوچ پنهنجو ڀرپور ڪردار ادا ڪيو _سنڌ جي ناليواري ليکڪ پروفيسر انعام شيخ چيو ته ڊاڪٽر اين اي بلوچ هڪ غير روايتي ۽ غير معمولي عالم هو جنهن جي تربيت ۽ تعليم دنيا جي جديد ادارن مان ٿي پر سندن دل ۽ روح هميشه سنڌ سان سلهاڙيل رهيو ۽ اهو ئي سبب آهي جو سندس سموري تحقيق جا مو ضوع ۽ توجهه جا مرڪز سنڌ، سنڌي ماڻهو ۽ انهن جا رواج ۽ روايتون رهيون_ ان موقعي تي سينيئر صوبائي وزير تعليم پير مظهر الحق، سيڪريٽري ثقافت عبدالعزيز عقيلي، اڳوڻو ايم پي اي رئيس شير محمد انڙ، آفتاب انڙ، شمس جعفراڻي، پروفيسر سيد زوار نقوي، نواز علي شوق، پروانو ڀٽي، قيصر خان نظاماڻي، ڊاڪٽر محمد علي مانجهي، عنايت بلوچ، اشتياق انصاري، زيب سنڌي، محمدعلي ڏيپلائي، محمد علي قاضي، غلام نبي مورائي، ذوالفقار هاليپوٽو، دودو مهيري، منصورقادرجوڻيجو، ريجنل ڊائريڪٽر اطلاعات حيدرآباد امداد علي ڪيريو، بدر ابڙو، حميد سنڌي، ڊاڪٽر عبدالغفار سومرو، گل محمد عمراڻي، خليل کوسو، مختيارملڪ، پروفيسر سليم ميمڻ، قمرراڄپر، هادي بخش جتوئي، محمد قاسم ٻگهيو، استاد اميرعلي، مٺو مهيري ۽ ٻيا پڻ وڏي انگ ۾ ڊاڪٽر اين اي بلوچ جي تڏي تي موجود هئا.