ضمير کرل، شهدادڪوٽ
پيپلز پارٽي حڪمرانن ملڪ جو ستيو ناس ڪري ڇڏيو، ن ليگ شهدادڪوٽ ۾ نواز ليگ پاران پ پ حڪومت جي خاتمي تي يومِ نجات ملهائيندي ريلي ڪڍي جشن ملهايو ويو، نواز ليگ ۽ ٻين پارٽين جي ڪارڪنن مير غيبي خان مغيري،جسقم اڳواڻ ذوالفقار مگسي،نواز ليگ سٽي صدر رونق علي شاهه، ايڊووڪيٽ عبدالوهاب کوسو،محبوب لوڌي،يونس عمراڻي، ڪرم هسباڻي،منور منگي ۽ ٻين جي اڳواڻيءَ ۾ مغيري هائوس کان ويلي ڪڍي شهر جي مختلف رستن جي گشت ڪرڻ بعد ڪوٽو موٽو چوڪ تي پهچي دهل ۽ شرناين جي ڌن تي جهمريون هنيون ۽ مٺائي پڻ ورهائي وئي، جلسي کي خطاب ڪندي اڳواڻن چيو ته پيپلز پارٽي حڪمرانن ملڪ جو ستيو ناس ڪري ڇڏيو، سندن رڪارڊ ڪرپشن سبب ملڪ ۾ مهانگائي،بک بدحاليءَ جو ريشو وڌيو، هنن چيو ته جيڪو ڪم ضياءُ الحق نه ڪيو اهو ڪم پ پ حڪمرانن سنڌ جي عوام کي ڪري ڏيکاريو، هنن چيو ته سندن غلط پاليسين سبب ملڪ جو عوام ڏچي ۾ آهي، سنڌ جو عوام بيروزگاري،بد حالي سبب خيرات پنڻ تي مجبور آهي، هنن چيو ته پ پ حڪمرانن جي خاتمي سان عوام جو ڇوٽڪارو ٿيندو هنن چيو ته ايندڙ چونڊن ۾ پيپلز پارٽيءَ کي ناڪامي نصيب ٿيندي ۽ نواز ليگ اميد وار اڪثريت سان ڪاميابي ماڻي ڏتڙيل عوام جا مسئلا حل ڪندا، ان موقعي تي واڳي تنوير علي چوڍيو قومي گيت پيش ڪري ماڻهن کي جومائي ڇڏيو.
