لاڙڪاڻو لڳ ماهوٽا شهر ۾ ٻارڙن جي ڳالهه تي جھيڙو
بيورو رپورٽ ،لاڙڪاڻو
لاڙڪاڻو لڳ ماهوٽا شهر ۾ ٻارڙن جي ڳالهه تان جوڻيجا ۽ شاهاڻي برادريءَ ۾ جهيڙو، لٺيون ۽ چاقو لڳڻ سبب 2 ڄڻا زخمي، اسپتال داخل، زخمين جي فرياد تي ماهوٽا ٿاڻي تي ڪيس داخل. تفصيل موجب گذريل ڏينهن لاڙڪاڻو لڳ ماهوٽا ٿاڻي جي حد ۾ ٻارڙن جي معمولي ڳالهه تان جوڻيجا ۽ شاهاڻي برادريءَ جي ڌرين وچ ۾ جهيڙو ٿي پيو، جنهن جي نتيجي ۾ لٺين جي وسڪاري ۽ چاقو لڳڻ جي نتيجي ۾ منٺار علي جوڻيجو، ظهور علي جوڻيجو رتورت ٿي ويا ۽ سخت زخمي ٿيڻ جي ڪري سندن زخمين کي لاڙڪاڻي چانڊڪا اسپتال جي حادثات واري شعبي ۾ علاج لاءِ داخل ڪرايو ويو آهي، جتي زخمين جو علاج جاري هيو. هوڏانهن زخمين جي فرياد تي ماهوٽا ٿاڻي تي جوابدار علي گل شاهاڻي، گاجي شاهاڻي سميت 8 ڄڻن مٿان ڪيس داخل ڪيو ويو آهي، ڪيس داخل ٿيڻ کانپوءِ پوليس جوابدارن کي گرفتار ڪرڻ لاءِ مختلف هنڌن تي ڇاپن جو سلسلو جاري رکيو آهي.