مختلف ضلعن ۾ جانورن کي مختلف وچڙندڙ بيمارين کان بچائڻ لاءِ اينيمل هسبنڊري کاتي پاران خصوصي ڪيمپون
حيدرآباد : ڊائريڪٽر اينيمل هسبينڊري سنڌ حيدرآباد پنهنجي جاري ڪيل پڌرائي ۾ ٻڌايو آهي ته تازين پيل برساتن کان متاثر ٿيندڙ ضلعن جهڙوڪ شڪارپور ،خيرپور ،گهوٽڪي ، سکر ، ڪشمور ۽ جيڪب آباد ۾ جانورن کي مختلف وچڙندڙ بيمارين کان بچائڻ لاءِ اينيمل هسبنڊري کاتي پاران خصوصي ڪيمپون قائم ڪيون ويون آهن جتي وٽرنري ڊاڪٽرن ۽ عملي پاران جانورن کي مختلف وچڙندڙ بيمارين کان بچاءُ جا ٽڪا لڳائڻ سان گڏوگڏ انهن جو مڪمل علاج ڪيو پيو وڃي ۽ هن وقت تائين ڪل 48358 ننڍن وڏن جانورن جو علاج به ڪيو ويو آهي ۽ انهن کي مختلف بيمارين کان بچاءُ جا ٽڪا پڻ لڳايا ويا آهن _ هن پنهنجي اڄ هتي جاري ڪيل بيان ۾ وڌيڪ چيو آهي ته انهن ڪيمپن تي ايندڙ مالوندن جي رهنمائي ۽ کين سندن مال کي بچائڻ لاءِ احتياطي اپاءُ اختيار ڪرڻ بابت مفيد مشورا پڻ ڏنا پيا وڃن _ هن ان سلسلي ۾ مالوندن کي صلاح ڏني آهي ته اهي ڪنهن به مسئلي يا معلومات لاءِ کاتي جي قائم ڪيل ويجهي وٽرنري اسپتالن ۽ وٽرنري مرڪزن سان رابطو ڪري رهنمائي حاصل ڪري سگهن ٿا.