ڳوٺ باگوجا ڀاڻ جي رهواسين جو هڪ سال کان روڊ جو ڪم اڌ ۾
خيرپور(رپورٽ شڪيل احمد جانوري) گمبٽ تعلقي جي ڳوٺ باگوجا ڀاڻ جي رهواسين جو هڪ سال کان روڊ جو ڪم اڌ ۾ هجڻ خلاف پريس ڪلب خيرپور اڳيان احتجاجي مظاهرو ڪيو. تفصيل موجب گمبٽ تعلقي جي ڳوٺ باگوجا ڀاڻ جي رهواسين مسرور احمد، نظير احمد، غلام شبير، علي گوهر ۽ ٻين پريس ڪلب خيرپور اڳيان روڊس کاتي ۽ ٺيڪيدار خلاف احتجاجي مظاهرو ڪيو. مظاهرين چيوته هڪ سال کان ٺيڪيدار ڳوٺ ڏانهن ايندڙ رستي تي مٽي ۽ پٿرن کوڙا ڪري گم ٿي ويو آهي جنهن ڪري ڳوٺ ڏانهن اچڻ وڃڻ وارن کي سخت تڪليف آهي جڏهن ته اسان اهڙيون شڪايتون ڊسٽرڪٽ روڊ آفيسر ۽ ڊي سي کي به ڪيون آهن پر هنن ٻڌي اڻ ٻڌي ڪري ڇڏي آهي. هنن چيوته اسانکي اهو به معلوم ٿيو آهي ته روڊ جا پئسا ٺيڪيدار انجنيئر سان ملي ڀڳت ڪري ايڊوانس بل ڪڍرائي ڳهي ويو آهي. هنن چيوته جيڪڏهن روڊ جو ڪم فوري طور تي شروع نه ڪيو ويو ته انجنيئر ۽ ٺيڪيدار خلاف عدالت ۾ درخواست داخل ڪرائينداسين.