ٽرانسفارمر تبديل ڪرائڻ لاء شهري قرآن پاڪ کڻي واپڊا آفيس پهچي ويا
شهدادڪوٽ ۾ ٻه مهينا اڳ سڙيل ٽرانسفارمر تبديل ڪرائڻ لاء شهري پاڪ ڪتاب کڻي واپڊا آفيس پهچي ويا ، شهرين ٽرانسفارمر تبديل نه ڪرڻ خلاف احتجاج ڪيو ، ڪلهوڙا ۽ کوسا پاڙي جي رهواسين وحيد کوسو ، حاجي کوسو ، سرور ٻٻر ، ضمير تونيو ، بگُڙ خاراني ، حسنين عباسي ۽ ٻين جي اڳواڻي ۾ احتجاجن پاڪ ڪتاب کڻي واپڊا آفيس آڏو پهچي ڌرڻو هڻي ويهي رهيا ، ان موقعي تي اڳواڻن ميڊيا وارن سان ڳالهائيندي چيو ته ٻه مهينا اڳ پاڙي جو ٽرانسفارمر سڙي ويو آهي جنهن کي تبديل نه ٿو ڪيو وڃي ، جنهن سبب سخت گرمي ۾ کين سخت تڪليف ڪاٽڻي پوي ٿي . هنن چيو ته هُو مجبور ٿي واپڊا عملدارن وٽ پاڪ ڪتاب کڻي آيا آهن ، هنن سڙيل ٽرانسفارمر تبديل ڪري رهواسين جي تڪليفن کي ختم ڪرڻ جي گھر ڪندي ٻي صورت ۾ سخت احتجاج جو چتاء ڏنو آهي ، هوڏانهن واپڊا عملدارن کين مسئلي جي حل جي خاطري ڪرائي ڌرڻو ختم ڪرايو .