ٻوڏ متاثرن نوجوانن پاران احتجاجي مظاهرو

پير جو ڳوٺ (رپورٽر) ڪنگري جي ڪچي جي ڳوٺ صادق ڪلهوڙو جي ٻوڏ متاثرن نوجوانن پاران ماستري جا آفر آرڊر نه ملڻ خلاف پيرڳوٺ ۾ احتجاجي مظاهرو ڪري ڌرڻو هنيو ويو، احتجاج ڪندڙن جي اڳواڻي نادر ڪلهوڙو، حافظ محمد نواز، غلام اصغر ڪلهوڙو، بشير ڪلهوڙو، امير سلطان ڪلهوڙو ۽ ٻيا ڪري رهيا هئا ان موقعي تي احتجاج ڪندڙن سخت نعريبازي ڪندي چيو ته 2010 جي مها ٻوڏ ۾ اسانجو سڀ ڪجهه لڙهي تباهه ٿي ويو جنهنڪري اسان سخت مالي بدحالي جو شڪار آهيون جڏهن ته اسان سنڌ يونيورسٽي معرفت ورتل ماستري جي ٽيسٽ پاس ڪئي آهي جنهن بعد اسان جا نالا ميرٽ لسٽ ۾ پڻ ڏنا ويا پر تنهن باوجود به هيل تائين اسانکي آفر آرڊر نٿا ڏنا وڃن جيڪا اسان ٻوڏ سٽيل سان هڪ وڏي ناانصافي آهي هنن چيو ته جيڪڏهن اسانکي جلد آفر آرڊر نه ڏنا ويا ته خيرپور باءِ پاس تي ڌرڻو هنيو ويندو.