اغوا ٿي ويل سونارو نذير بروهي اڃان بازياب نه ٿيو
شهدادڪوٽ ( رپورٽ : ضمير کرل ) شهدادڪوٽ مان 21 ڏينهن اڳ اغوا ٿي ويل سونارو نذير بروهي بازياب نه ٿيو ، شهرين پاران سندس بازيابي لاء قرآن خواني ۽ بک هڙتال ڪئي وئي ، مظلوم جدوجھد ڪاميٽي جي سڏ تي نوجوان سوناري جي بازيابي لاء ٻئي ڏينهن به ڪوٽوموٽو چوڪ تي قائم بک هڙتالي ڪئمپ تي قرآن خواني ڪري سندس بازيابي لاء خاص دعائون گھريون ويون ، جڏهن ته شهر جي مختلف سياسي ، سماجي تنظيمن جي اڳواڻن ۽ شهرين ڪاميٽي جي چئيرمين مير مظفربروهي ، ميرغيبي خان مغيري ، مولانا محمد جان عابد ، محمد خان جتڪ ، سردار بروهي ، واحد ڪالاڻي ۽ ٻين جي اڳواڻيءَ ۾ بک هڙتال پڻ جاري رکي ، ان موقعي تي ميڊيا وارن سان ڳالهائيندي اڳواڻن چيو ته پوليس شهري جي بازيابي لاء ڪي به اپاءُ ناهن ورتا ، جنهن سبب سندس گھر ۾ ڪهرام متل آهي ، پر انتظاميه جي ڪن تي جونءَ به نه ٿي چُري هنن نذير بروهي کي بازياب ڪرائي سندس وارثن ۽ شهرين ۾ پکڙيل بي چيني کي ختم ڪرڻ جو مطالبو ڪيو آهي ، ٻي صورت ۾ هنن سخت احتجاج جو چتاء ڏنو آهي .