پير جو ڳوٺ: اغوا نارين جو اڃان پتو نه پيو
پير جو ڳوٺ (رپورٽ: اصغر ملاح) وڏا مهيسر مان اغوا ڄاڻايل ٽن عورتن جو پتو نه پيو، 8 ڄڻن خلاف اغوا جو ڪيس داخل، هڪ گرفتار ، ڌرين ۾ ڇڪتاڻ تيز، رپورٽ موجب، وڏا مهيسر مان هڪ هفتو اڳ اغوا ڄاڻايل نوجوان ناري رخسانه زال اشفاق مهيسر، جاويدان زال ماجد مهيسر، وزيران زال ارباب مهيسر جو سخت ڳولا باوجود وارثن کي پتو نه پئجي سگهيو آهي هوڏانهن احمدپور ٿاڻي تي ارباب مهيسر جي فرياد تي جوابدارن ظفر ميتلو، گلشير ميتلو، ممتاز ميتلو ۽ ميتلا برادري جي ٽن عورتن سميت 8 ڄڻن مٿان اغوا جو ڪيس داخل ڪيو ويو آهي
ٻئي طرف احمدپور پوليس ڪيس ۾ ڄاڻايل جوابدرن جي گهرن تي چڙهائي ڪري هڪ جوابدار ظفر ميتلو کي گرفتار ڪري لاڪ اپ ڪري ڇڏيو آهي جڏهن ته ڪيس داخل ٿيڻ ۽ گرفتاري بعد مهيسر برادري ۽ ڳوٺ خدا بخش ميتلو جي ميتلا برادري جي ڌرين ۾ سخت ڇڪتاڻ واري صورتحال پيدا ٿي وئي آهي ۽ ڪنهن به وقت وڏي خوني ويڙهاند ٿي سگهي ٿي. هوڏانهن پوليس ڪيس ۾ ڄاڻايل وڌيڪ جوابدارن جي گرفتاري لاءِ مختلف هنڌن تي ڇاپا هڻي رهي آهي.