حيدر آباد

سنڌ جي اديبن ، دانشورن ۽ ليکڪن سنڌي ٻولي جي ناليواري ليکڪن ۽ تخليقڪارن طارق عالم ابڙو ، منصور ملڪ ۽ حسن درس کي زبردست خراج تحسين پيش ڪندي چيو آهي ته سنڌ جي انهن ناميارن ۽ اڻملهه موتين جي وڇوڙي کانپوءِ پيدا ٿيل خال ڪڏهن به ڀرجي نٿو سگهي _ اهڙن خيالن جو اظهار هنن اڄ سنڌي ٻولي اٿارٽي پاران ڊاڪٽر اين اي بلوچ هال ۾ ڪوٺايل تعزيتي ريفرنس ۾ خطاب ڪندي ڪيو _ تقريب کي خطاب ڪندي سنڌي ٻولي اٿارٽِي جي چيئرپرسن ڊاڪٽر فهميده حسين چيو ته منصور ملڪ سنڌي ادب کي 11 بهترين ڪتاب ڏنا جن مان 5 شاعري جا آهن جيڪي هميشه اسان کي سندس ياد ڏياريندا رهندا _ هن چيو ته طارق عالم ابڙو بهترين ڪهاڻيڪار ، آرٽسٽ ۽ هڪ خانداني تخليقڪار هو _ هن وڌيڪ چيو ته طارق عالم ابڙو هڪ خوش طبيعت ۽ خوش اخلاق ماڻهو هو جنهن کي پنهنجي فن ۽ سنڌي ادب سان گهڻي دلسچسپي هئي _ حسن درس کي ڀيٽا ڏيندي ڊاڪٽر فهميده حسين چيو ته حسن درس جديد شاعري جو حسن هو، هوشيخ اياز جو تسلسل هو

ضلعي ايڊمنسٽريٽر حيدرآباد آفتاب احمد کتري لاڳاپيل عملدارن کي هدايت ڪئي آهي ته هو ضلعي ۾ ڀاڻ جي هٿرادو کوٽ ۽ ان جي اگهن کي ضابطي ۾ رکڻ لاءِ هنگامي بنيادن تي اثرائتي ڪارروائي ڪن. اهڙن خيالن جو اظهار هن اڄ شهباز هال حيدرآباد ۾ ڀاڻ جي موجودگي کي يقيني بنائڻ جي حوالي سان منعقد ڪيل هڪ گڏجاڻي جي صدارت ڪندي ڪيو. گڏجاڻي ۾ اي ڊي او روينيو ،اي ڊي اوز زراعت ، ڊي او روينيو، سنڌ آبادگار بورڊ ، چيمبر آف زراعت ، فوجي فرٽيلائيزر ، اينگرو ڪيميڪل ۽ ڀاڻ جي ڊيلرن جي نمائندن پڻ شرڪت ڪئي .ضلعي ايڊمنسٽريٽر حيدرآباد آفتاب احمد کتري چيو ته زراعت قومي ترقي ۾ ڪرنگهي جي هڏي واري حيثيت رکي ٿي ۽ ملڪ جي ترقي جو دارو مدار زراعت تي آهي . هن چيو ته ضلعي حڪومت جي اولين ترجيح آهي ته آبادگارن کي وڌ کان و ڌ کان گهربل سهولتون فراهم ڪيون وڃن ته جيئن ملڪ مان بيروزگاري ۽ غربت جو خاتمو آڻي سگهجي . هن واسطيدار عملدارن کي سختي سان هدايت ڪندي چيو ته ضلعي ۾ آبادگارن کي ڀاڻ ، ٻج ۽ زرعي اوزارن جي فراهمي کي يقيني بڻائڻ سميت بليڪ مارڪيٽنگ ۽سندن جائز شڪايتن جو ازالو ڪيو وڃي

سنڌ پبلڪ سروس ڪميشن حيدرآباد جي امتحانن واري ايڊيشنل ڪنٽرول پنهنجي پڌرائي ۾ ڄاڻايو آهي ته سنڌ جي تعليم ۽ خواندگي کاتي ۾ ليڪچرار سوشالاجي (مرد /عورت) بي پي ايس 17 جي خالي آسامين لاءِ جون 2011 ۾ اهل اميدوارن کان ورتل انٽرويو ۾ ڪامياب ٿيندڙ اميدوارن جي نالن جو اعلان ڪيو ويو آهي. تفصيل موجب عبدالقادر مشوري، نديم علي خشڪ، فيض رسول (معذور)، محمد عرس همير علي باريجو، عبدالرشيد، گيانچند، نظام الدين اوڍاڻو، غوث بخش، سيد عشرت علي، محمود احمد عثماني ۽ طفيل محمد غوري کي ليڪچرار سوشالاجي (مرد) جي خالي آسامين لاءِ جڏهن ته چاند بيبي سيد، ماروي خان کوسو، مبينا تبسم، تسليم جهان، ڪوثر پروين ۽سلما کي ليڪچرار سوشالاجي(عورت) بي پي ايس 17 جي خالي آسامين لاءِ ڪامياب قرار ڏيندي سندن ڄاڻايل آسامين تي مقرري جي سفارش ڪئي آهي

ضلعي ايڊمنسٽريٽر حيدرآباد آفتاب احمد کتري، لاڳايپل عملدارن کي هدايت ڪئي آهي ته هو چوماسي جي امڪاني برساتن کان اڳ شهر جي برسات وارن نالن جي صفائي واري ڪم کي يقيني بنائڻ لاءِ پنهنجا سمورا وسيلا ڪتب آڻين ته جيئن برسات واري پاڻي جي نيڪال کي يقيني بڻائي سگهجي. اهڙن خيالن جو اظهار هن اڄ ضلعي حڪومت پاران شهر کي خوبصورت بنائڻ لاءِ صفائي واري هفتي جي ڪم جي معائني جي موقعي تي ميڊيا سان ڳالهائيندي ڪيو.هن ان موقعي تي سنڌ سيمبلي جو ميمبر وسيم حسين پڻ ساڻس گڏ هو . ضلعي ايڊمنسٽريٽر آفتاب احمد کتري چيو ته ضلعي حڪومت ماڻهن کي صاف سٿرو ماحول فراهم ڪرڻ لاءِ هڪ جامع منصوبي تي عمل ڪري رهي آهي ته جيئن موجوده گدلاڻ واري ماحول کي ختم ڪري ماڻهن کي صاف سٿرو ماحول فراهم ڪري سگهجي

سنڌي لينگويج اٿارٽي حيدرآباد سنڌ طرفان سنڌي ٻولي جي ناميارن تخليقڪارن طارق عالم ابڙو ، حسن درس ۽ منصور ملڪ جي ياد ۾ هڪ تعزيتي ريفرس سڀاڻي 23 جون 2011 تي شام جو 4 وڳي اٿارٽي جي ڊاڪٽر اين اي بلوچ هال ۾ ڪوٺائي وئي آهي جنهن ۾ عبدالقادر جوڻيجو ، شوڪت حسين شورو ، انعام شيخ ، جامي چانڊيو ، نصير مرزا ، رسول بخش درس ، امر سنڌو ، اسحاق سميجو ۽ ٻيا مرحوم تخليقڪارن جي شخصيتن ۽علمي توڙي ادبي خدمتن تي روشني وجهندا.

حيدرآباد چيمبر آف ڪامرس اينڊ انڊسٽري طرفان سڀاڻي 23 جون کان 25 جون 2011 تائين ايڪسپو سينٽر حيِدرآباد ۾ ”مينگو شو“ جو اهتمام ڪيو ويو آهي جنهن جي افتتاحي تقريب سڀاڻي 23 جون 2011 تي شام جو 6 وڳي ڌاري رکي وئي آهي جنهن ۾ زراعت وارو صوبائي وزير سيد علي نواز شاهه خاص مهمان طور شرڪت ڪندو جڏهن ته ان موقعي تي سنڌ جي وڏي وزير جو صوبائي صلاحڪار امام الدين شوقين ۽ چيئرمين ٽريڊ ڊولپمينٽ اٿارٽي آف پاڪستان طارق اقبال پوري ۽ ٻيا پڻ شرڪت ڪندا.

ضلعي حڪومت حيدرآباد طرفان ايندڙ برسات کان اڳ برساتي نالن جي صفائي ، اسپتالن ، قبرستانن اڳيان حد دخلين هٽائڻ ، صفائي ڪرڻ ۽ شهر کي خوبصورت بنائڻ لاءِ اڄ کان 28 جون 2011 تائين صفائي جو هفتو ملهايو پيو وڃي جنهن جو افتتاح اڄ شهباز بلڊنگ حِيدرآباد ۾ ماهيگيري واري صوبائي وزير زاهد علي ڀرڳڙي ۽ ٻهراڙي جي ترقي واري صوبائي وزير زبير احمدخان ڪيو جڏهن ته ان موقعي تي متحده قومي موومينٽ جي سنڌ اسيمبلي جا ميمبر وسيم حسين، سهيل يوسف ، ڊي سي او حيدرآباد آفتاب احمد کتري پ پ پ جا اڳواڻ پاشا قاضي ،فياض شاهه ، عبدالجبار، سليم بخاري ، ۽ ٻيا پڻ موجود هئا .ان موقعي تي پريس ڪانفرنس کي خطاب ڪندي ماهيگيري واري صوبائي وزيرزاهد علي ڀرڳڙي چيو ته اتحادي حڪومت ۾ شامل سموريون ڌريون شهر حيدرآباد جي ترقي ۽ خوشحالي لاءِ سنجيدگي سان قدم کڻي رهيون آهن

ضلعي ايڊمنسٽريٽر حيدرآباد آفتاب احمد کتري چيو آهي ته ضلعي حڪومت عوام کي صحت جي بنيادي سهولتن جي فراهمي کي يقيني بڻائڻ لاءِ هڪ جامع رٿابندي تي عملدرآمد ڪري رهي آهي ته جيئن ماڻهن کي سندن گهرن جي درن تي بهتر طبي سهولتون فراهم ڪري سگهجن. اهڙن خيالن جو اظهار هن اڄ پنهنجي ڪيمپ آفيس ۾ ڊسٽرڪٽ گورنمينٽ شاهه ڀٽائي اسپتال حيدرآباد ۽ لياقت يونيورسٽي آف ميڊيڪل هيلٿ سائنس ( لمس ) ڄامشورو جي الحاق جي حوالي سان منقعد ڪيل هڪ گڏجاڻي جي صدارت ڪندي ڪئي _ گڏجاڻي ۾ لمس ڄامشورو جي وائيس چانسلر پروفيسرڊاڪٽر نوشاد شيخ، ڊين سرجري لمس، ڊين ميڊيسن لمس، ڊائريڪٽر مليريا، اي ڊي او هيلٿ ، ايم ايس شاهه ڀٽائي اسپتال ۽ ٻين لاڳاپيل عملدارن پڻ شرڪت ڪئي

ڊائريڪٽرجنرل زرعي توسيع کاتي سنڌ شهاب الدين صديقي پنهنجي پڌرائي ۾ ڄاڻايو آهي ته سنڌ ۾ دواساز ڪمپنيون يا انهن جا جيڪي ڊيلر آهن اهي ڪاروبار صاف سٿرو ۽ ڪنهن به ملاوٽ کان پاڪ طريقي سان ڪن ته جيئن آبادگار ان معياري دوائن کي فصلن ۾ ڪتب آڻي سگهن ته جيئن بيمارين تي ضابطو آڻي بهتر پيداوار حاصل ڪري سگهجي. هن وڌيڪ چيو ته زرعي دواساز ڪمپنيون جن جو رجسٽريشن وارو مدو پورو ٿي چڪو آهي اهي پاڻ کي حڪومت سنڌ وٽ ٻيهر رجسٽرڊ ڪرائين ٻي صورت ۾ سندن خلاف پيسٽيسائيڊ آرڊيننس تحت سخت ڪارروائي ڪئي ويندي ان سلسلي ۾ اٽڪل 29 زرعي دوا ساز ڪمپنين کي نوٽيس به جاري ڪيا ويا آهن

پاڪستان پيپلز پارٽي حيدرآباد پاران شهيد محترمه بينظير ڀٽو جي 58 هين سالگره جي موقعي تي کيس زبردست خراج عقيدت پيش ڪرڻ لاءِ اڄ ضلعي ڪائونسل حيدرآباد ۾ قرآن خواني جو اهتمام ڪيو ويو جڏهن ته سالگره جو ڪيڪ پڻ ڪاٽيو ويو _ بعد ۾ پ پ پ جي مقامي اڳواڻن ، ڪارڪنن ۽ شهرين پنهنجي رت جو عطيو ڏئي شهيد محترمه سان پنهنجي محبت جو اظهار ڪندي سندس مشن کي جاري رکڻ جو عزم ڪيو _ ان موقعي تي ماهيگيري واري صوبائي وزير زاهد علي ڀرڳڙي پنهنجي خطاب ۾ شهيد محترمه بينظير ڀٽو جي ملڪ جي مظلوم طبقي لاءِ ڪيل جدوجهد ۽ قرباني تي کيس خراج عقيدت پيش ڪندي چيو ته ملڪ جو عوام اڄ به پ پ پ سان گڏ آهي جنهن جي نتيجي ۾ ملڪ اندر اڄ جمهوي حڪومت ڪاميابي سان هلي رهي آهي