حيدر آباد

ڊائريڪٽر اينيمل هسبينڊري سنڌ حيدرآباد مالوندن ڀائرن کي صلاح ڏني آهي ته هو سانوڻ جي برسات دوران پنهنجن جانورن کي مختلف وچڙندڙ بيمارين کان محفوظ رکڻ لاءِ پنهنجي ويجهي وٽرنري اسپتالن يا ڊسپينسرين تان جانورن کي حفاظتي ٽڪا هڻائين. هن مالوندن ڀائرن کي اها به صلاح ڏني آهي ته هو ضلعي لائيو اسٽاڪ آفيسر يا لاڳاپيل ضلعي اينيمل هسبينڊري سان لهه وچڙ ۾ اچن يا ايمرجنسي صورت ۾ فون نمبر 0229200990 تي به رابطو ڪري سگهن ٿا .

سنڌ پبلڪ سروس ڪميشن حيدرآباد جي امتحانن واري ايڊيشنل ڪنٽرول پنهنجي هڪ تصيحي پڌرائي ۾ ڄاڻايو آهي ته 18 جون 2011 تي ڪميشن پاران انسٽرڪٽر/ ليڪچرار سوشل اسٽيڊيز بي پي ايس 17 (مرد ۽ عورت) جي آسامين لاءِ شايع ٿيل پريس رليز ۾ غلطي سبب ڄاڻايل آسامي جو کاتو بيورو آف ڪريڪيولم اينڊ ايڪسٽينشن ونگ ڄامشورو بدران سنڌ جي تعليم ۽ خواندگي کاتو شايع ٿي ويو هو تنهنڪري ڄاڻايل آسامين جي کاتي کي بيورو آف ڪريڪيولم اينڊ ايڪسٽينشن ونگ ڄامشورو پڙهيو وڃي .

سنڌ زڪوات ڪائونسل جي چيئرمين جسٽس (ر) زاهد قربان علوي گذريل ڏينهن اپوا اسڪول لطيف آباد نمبر 8 ۽ ڪرم مصطفيٰ مسجد ۾ تعلقي لطيف آباد حيدرآباد جي 17 لوڪل زڪوات ڪميٽين جي مستحقين ۾ 8 لک 67 هزار رپيا ۽ ٽن غريب نياڻين جي شادي لاءِ ڏاج جي رقم 30 هزار رپين جا چيڪ ورهايا. ان موقعي تي سيد فياض حسين شاهه ۽ ضلعي زڪوات ڪميٽي جو چيئرمين حاجي شير محمد پيرزاده موجود هو. بعد ۾ زڪوات جي ورڇ واري عمل کي شفاف بنائڻ ۾ ڀرپور ڪردار ادا ڪرڻ تي سنڌ زڪوات ڪائونسل جي چيئرمين جسٽس (ر) زاهد قربان علوي ۽ ضلعي ڪميٽي حيدرآباد جي چيرمين کي شيلڊون پڻ ڏنيون ويون

سنڌ پبلڪ سروس ڪميشن حيدرآباد جي امتحانن ايڊيشنل ڪنٽرولر جي پڌرائي موجب سنڌ جي تعليم ۽ خواندگي کاتي ۾ ليڪچرار فزڪس ( عورت) بي پي ايس 17 جي آسامين لاءِ مئي ۽ جون 2011 ۾ ورتل اهل اميدوارن کان انٽرويو ۾ ڪامياب ٿيندڙ اميدوارن جا نالا پڌرا ڪيا ويا آهن _ تفصيل موجب مس ثنا نيازي، مس نورين رحمان ، ثمرين شيخ، ثنا امبرين فاطمه، حبا حق، مرڪ مستوئي، صباڪنول، شافيه نظاماڻي، ليزناشير محمد ، يسريٰ فردوس اعواڻ ، ثنا، سمبل زهره ، بشريٰ ايمان، مهرين سليم، اربينه ، حناسيد، شگفته، رشيده خاتون، نازش عروج ، صدف ، سارا خان، شمائيلا فرزند علي، شهنيلا غني، امبرين بانو،فرزانه کيڙو، مس خديجه رحيم، افشين ، عائشه ، انجم، شازينه، مهڪ ۽ اسما آرائين کي ڄاڻايل آسامين لاءِ ڪامياب قرار ڏيندي سندن مقرري جي سفارش ڪئي وئي آهي.

ٻهراڙي جي ترقي واري صوبائي وزير زبير احمد خان چيو آهي ته ڪراچي وانگر حيدرآباد ۾ به 22 جون 2011 کان صفائي جو هفتو ملهايو ويندو جنهن دوران نالن ، روڊن ۽ گهٽين جي صفائي ڪئي ويندي ته جئين عوام کي صاف ۽ صحت مند ماحول فراهم ٿي سگهي – هو اڄ شام ضلعي ناظم سيڪريٽريٽ حيدرآباد ۾ صفائي جي هفتي ۽ امڪاني سانوڻي جي برساتن جي سلسلي ۾ گهربل انتظامن جو جائزو وٺڻ لاءِ ڪوٺايل هڪ گڏجاڻي صدارت ڪري رهيو هو – گڏجاڻي کي خطاب ڪندي صوبائي وزير چيو ته حيدرآباد شهر اسان سڀني جو آهي ۽ ان کي صاف سٿرو رکڻ پڻ اسان سڀني جي ذميواري آهي- هن واسا ۽ تعلقا ايڊمنسٽريشن جي انتظاميا کي هدايت ڪئي ته اهي برساتن جي پاڻي جي نيڪال لاءِ جو ڳا اپاءُ اختيار ڪندي گهربل مشينري کي استعمال جوڳي حالت ۾ رکڻ کي يقني بڻائين ته جئين برسات جي پاڻي کي فوري طور تي نيڪال ڪري شهرين کي پريشاني کان بچائي سگهجي -

پاڪستان پيپلزپارٽي سنڌ جي جنرل سيڪريٽري تاج حيدر چيو آهي ته شهيد محترمه بينظيرڀٽو کي ان جي سالگرهه جي موقعي تي خراج عقيدت پيش ڪرڻ لاءِ نوجوانن پاران ڏنل رت جي عطيي کي محفوظ بنائڻ ۽ ان جي اسڪريننگ لاءِ سنڌ جي صحت کاتي ۽ مشهور بلڊ بينڪن جون خدمتون حاصل ڪيون وينديون. سرڪاري ميڊيا سان ڳالهائيندي تاج حيدر چيو ته شهيد محترمه بينظير ڀٽو، ملڪ ۽ قوم لاءِ پنهنجي جان جو نذرانو پيش ڪيو ۽ ان کي خراج عقيدت پيش ڪرڻ لاءِ رت جو عطيو ڏيڻ بهترين طريقو آهي . هن چيو ته رت جو عطيو جمع ڪرڻ جي ٽن ڏينهن واري مهم 20 جون 2011 کان گرمي سبب شام جي وقت ۾ شروع ٿيندي .

پاڪستان پيپلز پارٽي حيدرآباد ڊويزن طرفان شهيد محترمه بينظير ڀٽو جي 59 هين سالگره جي مناسبت سان 26 جون 2011 تي حيدرآباد ۾ محترمه شهيد بينظير ڀٽو شهيد هڪ انقلابي ۽ دور انديش اڳواڻ جي عنوان هيٺ هڪ سيمينار منعقد ڪيو ويندو جنهن جي صدارت پ پ پ سنڌ جو صدر ۽ سنڌ جو وڏو وزير سيد قائم علي شاهه ڪندو - اڄ هتي جاري هڪ پريس رليز مطابق پ پ پ حيدرآباد ڊويزن جي صدر ۽ بين الصوبائي رابطن واري صوبائي وزير مخدوم جميل الزمان ٻڌايو ته سيمينار ۾ پ پ پ جا مرڪزي اڳواڻ ، قومي اسيمبلي جي اسپيڪر ڊاڪٽر فهميده مرزا ، وفاقي وزير قانون مولا بخش چانڊيو، سينيٽر رضا رباني ، ڊاڪٽر پروفيسر اين ڊي خان، ڊاڪٽر ذوالفقار مرزا ، تاج حيدر ، سميت سنڌ جا ڀلوڙ اديب محمد ابراهيم جويو، يوسف شاهين ، ڊاڪٽر حبيب الله صديقي ، آغا سليم ، حفيظ لاکو ، نورلالهٰديٰ شاهه، نذير لغاري ، امر سنڌو ، ڊاڪٽر عبدالجبار خٽڪ ۽ شهيد محترمه بينظير ڀٽو جي شخصيت ۽ خدمتن تي روشني وجهندا

وڏي وزير جي نوجوانن جي معاملن واري صوبائي صلاحڪار عاجز ڌامرهه چيو آهي ته محترمه فريال ٽالپر جي خاص هدايتن تي پاڪستان پيپلزپارٽِي جي بهتر پبلسي ۽ پروپيگينڊا جو مقابلو ڪرڻ لاءِ پارٽي جي اطلاعات سيڪريٽرين جا تربيتي ورڪشاپ هر يو سي ۽ ضلعي سطح تي ڪرايا ويندا جڏهن ته حيدرآباد ۾ تمام جلد صوبي جي سمورن اطلاعات سيڪريٽرين جوٽن ڏينهن وارو تربيتي ورڪشاپ پڻ ڪرايو ويندو _ هن اهڙو اظهار اڄ انيڪسي بلڊنگ سرڪٽ هائوس حيدرآباد ۾ پ پ پ يوٿ جي مختلف ضلعي اطلاعات سيڪريٽرين جي هڪ ڏينهن واري تربيتي ورڪشاپ کانپوءِ هڪ پريس ڪانفرنس ڪندي ڪيو _ صوبائي صلاحڪار عاجز ڌامرهه وڌيڪ چيو ته ملڪ جو نوجوان باصلاحيت ۽ ذهين آهي ۽ انهن جي بهتر تربيت سان اهي مستقبل جي چيلنجن کي منهن ڏئي سگهن ٿا.

سنڌ پبلڪ سروس ڪميشن حيدرآباد جي امتحانن واري ايڊيشنل ڪنٽرول جي پڌرائي موجب سنڌ جي تعليم ۽ خواندگي کاتي ۾ ليڪچرار سوشل اسٽيڊيز(مرد ۽ عورت) بي پي ايس 17 جي آسامين لاءِ جون 2011 ۾ ورتل اهل اميدوارن کان انٽرويو ۾ ڪامياب ٿيندڙ اميدوارن جا نالا پڌرا ڪيا ويا آهن _تفصيل موجب ليڪچرار سوشل اسٽيڊيز(مرد) جي آسامين لاءِ عاشق حسين ميمڻ ، سيد عمران علي جعفري ، دليل خان جتوئي ۽ محمد ناطيق ميمڻ جڏهن ته ليڪچرار سوشل اسٽيڊيز (عورت) جي آسامين لاءِ سلطانه عروج پٺاڻ ، ناديه پروين ، نسرين ڀنڀرو ۽ مهرالنساءَ ميمڻ کي ڪامياب قرار ڏنو ويو آهي

ڊائريڪٽرجنرل زرعي توسيع جناب شهاب الدين صديقي، آبادگارن کان مارڪيٽ ڪميٽي ۽ لائسنس جي فيس جي نقد وصولي واري نظام کي ختم ڪري بينڪ ذريعي ادائيگي ڪرڻ واري نظام کي متعارف ڪرايو آهي ته جيئن وصولي کي شفاف ۽ حڪومت کي ان جي ترت ادائيگي کي پڻ يقيني بڻائي سگهجي . اڄ پنهنجي آفيس حڪم ذريعي ڊائريڪٽر جنرل ايگريڪلچر زرعي توسيعي کاتي شهاب الدين صديقي سڄي سنڌ جي مارڪيٽ ڪميٽين جي اڳواڻن ۽ سيڪريٽرين کي هدايتون جاري ڪيون آهن ته هو آبادگارن کان مارڪيٽ ڪميٽي ۽ لائسنس في جي مد ۾ وصولي رسيد بڪ تي ذريعي نه ڪن بلڪه کين بينڪ جا چالان فراهم ڪن ۽ وصولي واري ڪم کي بينڪ ذريعي يقيني بڻائين .هن آبادگارن کي پڻ مشورو ڏنو ته هو پنهنجي جنسن کي مارڪيٽ ۾ وڪري جي صورت ۾ مارڪيٽ ڪميٽي جي في مارڪيٽ ڪميٽي جي عملي کي ڏيڻ بدران ان کان بينڪ چالان وٺي بينبڪ ۾ جمع ڪرائين.